髮型師的貓貓狗狗

星期六去整頭髮, 貪近, 幫襯我老公剪開果個, 個髮型師係一個光頭, 非常高大, 有點肥的男人, 但說話的語氣卻有點娘娘腔.

佢見我睇貓書, 同我傾起貓貓狗狗來, 仲介紹佢訂開貓糧果間舖頭比我, 話佢 d 貓食巴西糧, 食到個個肥嘟嘟, 我一睇個牌子, 都唔知咩黎, 有點不安, 心想, 唔洗咁慳呀.......但聽完佢講兩件事, 完全改觀.

佢舖頭有三隻狗, 其中一隻小狗是新來的, 佢話:

"隻狗係我姨仔個細妹的, 本來差 d 無架喇, 準備拎去漁農處啪架喇, 我喝住咋, 隻狗仔咪黎左我度囉, 無計啦, 隻狗仔 '胡' 個 bb, 又成日吠, 養唔到. 但黎到我度, 又無吠喎 !"

我想, 狗仔係有性的, 有人錫, 開心, 又有其他狗仔陪玩, 咪唔吠囉........

佢跟住又講:

"有次隻貓突然唔舒服, 帶佢去東方睇, 個醫生都唔知咩事, 一按個肚, 就賴屎, 跟住有朋友提議出享和睇 william, 去到個醫生話可能係子宮發炎含膿, 要做手術, 要照 x 光再確定, 加加埋埋再二千幾架, 問我有冇問題, 我同醫生講, 你唔好同我講錢, 總之你同我醫好隻貓先, 隻貓做完手術就無事 lu."

聽完佢講呢兩件事, 無想過一個外表神高神大, 又剷光頭的麻甩佬, 內心原來咁溫柔, 雖然佢買一些廉價貓糧比貓貓食, 但佢又會晚晚整魚肉雞肉比貓食喎, 隻貓有病, 又無嫌手術費貴, 所以, 不應單憑一件事就去評論一個人, 睇人睇事, 都應該多方面的去睇.